رحله العمر

الزمان ... 16/8/2008 ..... المكان ... ميدان الأوبرا بدمنهور بعد صلاه الفجر تجمعنا أنا وأصحابي وكانوا ثلاثة للذهاب إلي رحله العمر ..... انتظرنا قليلا بناءا علي طلب بسيو ( واحد من صحابي ) الذي قال لنا أن هناك عربات سوف تتجه بنا من ميدان الأوبرا ... انتظرنا قليلا ومفيش حاجه جات ... ذهبنا إلي موقف دمنهور ووجدنا عربه صدفه سوف تذهب بنا إلي مكان الرحلة ... اشترط علينا أن الاجره تكون 7 جنيه ( طبعا ياما) بس مش مشكله ... انطلق بنا سريعا إلي رحله العمر .... ردد صديقنا رحومه دعاء السفر ورددنا وراءه.
الساعة 7.30 صباحا , المكان خالي ...صحراء ... شمس حارقه.... بعض من الأشجار الصحراوية .. وصلنا إلي السور .. البوابة...... استقبلنا هذا الشاب....عابس ...يرتدي بدله خضراء وكاب اخضر وحذاء طويل اسود......اقفوا طابور, صف واحد ...هكذا قال لنا هذا الشاب وهنا كانت بداية رحله العمر ...يوم الكشف الطبي في الجيش المصري.

تعامل معنا العساكر بنوع من الأدب علشان إحنا كنا دكاتره وبيخافوا يزعلوا حد مننا يكون ليه ضهر ومسنود.... جاءت اللحظة الحاسمة لحظه القلع .... كله يقلع هدومه كلها إلا ( الشورت).. الوقت بيمر..بكشف في كذا لجنه وكله لايق..ماشاء الله داخل داخل... وبعد كده وقفنا طابور علشان ييجي دكتور يبص علينا ويسمع الشكاوي ....نادي عليا وقلي تعالي افتح رجلك واقفلها ... لف...انت يبني طالع طالع ... الكلمة ديه مبقلهاش لأي حد ( طبعا كان حيغمن عليا من الفرحة) .....لبست هدومي وروحت علشان أجي تاني يوم اكشف عظام...السعادة غارمة ... أمي بتدعيلي ....
اليوم التالي .... الثامنه صباحا..... روحت الموقف علشان اركب مع صحبي احمد الي كنت متفق اسافر معاه ... ملقتهوش , كلمته قلي انا سافريت..... بدأت اتوغوش .. اليوم مش بادي حلو... روحت موقف أسكندريه وبعدين ركبت منه عربات التجنيد.....روحت العامرية وقفنا صف في انتظار طبيب العظام. رجل متوسط القامة, يميل الي السمنة قليلا... قمحي اللون..يرتدي قميص ابيض..جلس وبدأ في السباب..انتوا دكاتره ... الله يلعن أبو أم المؤهلات العليا...اقرفوني بقي...طبعا زى لجان الشفهي الي انا متعود عليها عرفت إن انا كده لابس لابس....
أول وحد دخله خد الي في النصيب لما قله إن عنده التصاق وقليه أتفضل بره يا دكتور....
جاء الدور عليا , عندك إيه .. فلات فوت وتباعد(انا رديت) ...افتح رجلك واقفلها ...ادير...طيب ..فكر كتير.. تجهم ..لائق (ب) روح المبني الي هناك وخد استمارة 110 جند . هيييييه انا دخلت الجيش وكمان مترشح ظاااااااابط.

يتابع................................