ارحل بقى

ارحل بقى
شعر: أحمد فؤادنجم

بحبك يا ريس
وحبك يا ريس
معكنن علىّ
مقطع لي قلبى
مطلع عينيــــة

سيبوني فى حالى
وبيا اللي بيـــــــا

دا كل اللي ليا

محرم عليـــــا

عشان حاجة واحدة

عشــــــانك يا ريس



دي كلمة قالوها زمان

من ســـــــــنين
وكل اللي قالها

مطـيـن بطـيـن
يا سارق فلوسنا

يا كاتم نفوسنا
يا واكل عرقنا

برجلك دايسنا

ولســـــة بحبك

وأحب اللى حبك

وباحلف هاحبك

وأحب اللى جابك

فى يوم أغبر علينا ريس

عليــــك البــــلد

لابنـــك وابنــــه

وولد الولد
سوزانك سوزانا

جمالك جمالنا

علاءك علاءنا
وبكرة وبعده

وطول الامد


غبــــاءك يا ريس

مالوش حل خالص
وسايق في الهبل

وكلامك هجايص
ولولاك يا ريس

ماكانشى دا حالي

وحال كل مصري

مدروخ ولايـص


قالوا العيشة حرة

وهي العيشة مرة
ومش مـــر عادي

دا صبرك يا ريس

ممرر بلادي
واسعار بترفع

ماتنزلش مرة

وباين علينا

هنطلع لبرة

بيصغر ما يكبر

وسعره يا ريس

بيرفع ماينزل
سألنا دا ماله

قالولنا الحديد

وايه العلاقة

بسعره الجديد
تكونش يا ريس

لغيت الدقيق

وبتطحن بداله

برادة حديد؟

ماهو انت اللي عارف

وسامع وشايف

جمالك قشــطنا
وعز اللى خاننا

وولـــع بلدنا

برفع الحديد

ماتصحى ياريس

وصحى البلد

هنبقى يا ريس

كمالة عدد

في وسط العوالم

وشعبي اللي هايم
وكبته اللي دايم

وقرشه اللي عايم

هنبقى يا ريس

كمالة عدد


واقولك واعيدلك
لاني بحبك

نصيحة فصيحة

نصيحة مريحة

لبلدي وبلدك

ماترحل يا ريس

ليه دايما متيس

ودايما مهيس

ماترحل بقى

وخد لي في وشك
جمالك .. مش باغشك
علاءك .. سوزانك
شريفك .. سرورك
نظيفك .. كمالك
وعزك .. دا خانك
خدهم وانصرفوا
أشـــتاتا أشتوت
خدهم وانصرفوا
لحسن حانموت

ارحل بقى
ارحل بقى
ماترحل بقى